Brinkola Legazpiko auzo bat da, herrigunetik 5 kilometrora dagoena, gune natural batean eta Aizkorri-Aratz parketik oso gertu. Garai batean bere biztanleek baserriko lanetan jarduten zuten, baina gaur egun gutxi batzuk dira horretan ari direnak eta brinkolar gehienek auzotik kanpo egiten dute lan. Kanpotarrak ere badira bertan, eta auzoak etorkinak jasotzen jarraitzen du, aurreko mendean bezala.
Brinkolak ez du aparteko zerbitzurik, ezta denda edo tabernarik ere. Patxiñe eta Joxemañe jatetxeak duela urte batzuk itxi ziren, eta gaur egun Armuño elkartea da auzotarren topagune bakarra. Auzo elkartea ere badago, Arriurdin, eta eliza ondoan duen egoitzatik auzotarren kezkak eta eskariak bideratzeaz arduratzen da, urtean zehar hainbat ekintza antolatzeaz gain. Abuztuaren 28aren inguruan ospatzen diren San Agustin jaien antolakuntzan ere laguntzen du, baita gabon eskean parte hartu ere.
Bi zubi handiak dira, trenarekin batera, auzoari nortasuna ematen dieten elementu esanguratsuenak. Trenak Brinkola eta Irun lotzen ditu ia ordueroko zerbitzuekin goizeko 6etatik gaueko 11ak arte, eta Legazpirako joan-etorrietarako Junetorri autobusa ere badago.
  Azken urteotan Brinkolara Lenbur Fundazioaren eskutik, Igeraldeko Ogiaren Txokoa eta Errota bisitatzera. Barrendiolako urtegiaren inguruak ere bisitari ugari jasotzen ditu.     

Tere Madinabeitia