Hastapenak

Elkartea ahalegin eta sufrimendu askoren ondoren 1972.eko Uztailaren 8an inauguratu zen. Aurrez, Legazpin, Korosti izeneko talde bat existitzen zen, OARGUIren (Obra Atlética Recreativa Guipuzcoana) barnean zegoena. Bertan ekintza ugari egiten ziren, hauetatik asko mendiarekin zerikusia zutenak. Elkartearen egoitza Patrizio Etxeberriaren ekonomatoa egin zen lokaletan zegoen eta, gerora, parrokiko lokaletara pasatu zen.

Legazpiar mendizaleek, baina, izaera juridiko propio bat izan nahi zuten, askotan desinformatuak sentitzen baitziren; Euskal Federazioa Donostian zegoen eta bileren berririk ez zuten jasotzen. Gainditu beharreko oztopoak, ordea, asko ziren eta, gehientsuenak, elizaren aldetik zetozen.

Lehen pausuak Endika Amilibiak eta  Periko Gabiriak eman zituzten. Azken honen etxean izandako bilera ugarietan, ideia hauek piskanaka gorpuzten joan ziren. Horrela, lokala erostea erabaki eta garai hartako 1463000 pezetako kreditu bat eskatu behar izan zen. Kreditua zenbait bazkideren ondasunekin abalatu zen.

Izadi Zaleak elkartearen inaugurazio eguna.

Hurrengo pausuak burokratikoak izan ziren; estatutuak onartu behar ziren. Ia bi urte luze behar izan ziren hauen onarpenarentzako, justu garai hartan euskal federaziorik ez zegoelako eta Pako Iriondo aukeratu arte zain egon behar izan zutelako. Orduan,  Madrilen eta Euskal Herrian, estatutuak onartu ziren. Baina arazoak ez ziren hor amaitu, estatutuak Guardia Zibilaren kuartelean aurkeztu behar baitziren, Gobernu Zibilak baimena eman zezan. Estatutuak kuartelean denbora luzez geldituta egon ziren. Santik, Perikoren anaiak, ezagun bat zuen: Alzugaray. Honek estatutuak bideratzen lagundu zuen, baina estatutuek geldirik jarraitzen zuten. Azkenean, Alzugaray bera kuartelean agertu eta, hurrengo egunean, estatuek zigilu ofiziala zuten. Alzugaray ohorezko bazkide izendatu zuten.

Jarraian sorrerako zenbait anekdota aipatuko ditugu:

• Hasierako bazkide bakoitzak sarrerako kuota bezala 1000 pezeta jarri zuen.
• Guardia Zibilak, aitzakia desberdinak jarrita, hasieran aurkeztu ziren lehendakariak onartu ez zituenez, lehen lehendakaria Benjamin Soraluze izan zen.
• Izadi Zaleak emakumeak onartzen zuen lehen elkarteetariko bat izan zen eta, segururenik, Euskal Herrian emakume bazkideak onartu zituen lehena.
• Logotipoa prestatzen Endikak eta Perikok saiakera asko egin zituzten, orain duguna lortu arte. Logoaren egilea Jose Andueza izan zen.
• Akta liburuari zigilua jartzeko, 1972ko udan, Batis Maiz Donostiara trenez eta, handik, Bergarako epaitegira autostop eginaz joan zen. Garai hartan, kotxe gutxi zirela kontu hartuta, bidaia oso luzea izan zen.
• Inaugurazio eguna Jose Martin Mendinuetaren ezkontzaren egun berdinean izan zen. Horrela, jendea  bi ekitaldietan murgildurik ibili zen.
• Elkartea sortu baino urtebete lehenago, elkarte moduan mendi irteerak egiten ziren. Aizkorrira egin zen lehena, Santa Teresako ikasleekin, arduraduna Maite Basabe zelarik.